2011年9月19日星期一

有一晚 一個來電.......... [(三)邁向戀愛的仲夏] -2

阿紫吞吞吐吐對住我,  講:因為..因為..我係你最好既女.....仔朋友呀(女呢個字拉佢長得好緊要,日記我有記低,因為當時佢既語氣真係好笑) 
我:哈哈,搞咩呀你!    
  都唔知你想講咩!  
  (語氣回復返沉重)我知你信得過,但我連朋友我都唔會點講,sorry呀。  
阿紫:咁你住對邊個先肯講?    你唔覺得咁樣屈住屈住好唔舒服架咩?  
比阿紫咁講一講,我冇出到聲,但我承認,成日收收埋埋真係好 
唔開心,但有時你知道就算搵人傾訴完都無補於事,咁仲傾黎做 
咩?事實就係事實,點都改變唔到架啦!我老豆係咁pk就係咁pk  
阿紫見我唔出聲,繼續講:阿樂....你做咩呀,唔好唔出聲啦。    
我:其實我都唔知對住邊個先會講,我連對住朋友都唔會講,仲有邊個會講?    
阿紫:咁女朋友呢?    
阿紫突然間咁問,令我有d摸不著頭腦,因為我自己都唔清楚,我又未試過。  
我直接答佢:我唔知喎真係,我又未試過拍拖,我點知會唔會講?    
之後,輪到阿紫冇出聲....    
我真係好後悔,早之唔入呢個話題,而家搞到個氣氛咁怪,  
我只好快d打完場轉話題好過。    
我:唔好講呢d住啦,即使講咩有d事實都改變唔到。    
於是,阿紫聽到我咁講,亦都好唔願意咁接受左.. 
我見佢語氣有點失落,我就哄返佢。 
我:阿紫,你唔好唔開心啦。    
  可能我未有心理準備架姐,我想講果時先講你知啦,好冇?  
  (而家惟有咁樣敷衍住阿紫先) 
阿紫見我咁講,即刻好似小朋友有糖食咁,開心返:好啦,算你啦。        
                       你話過架,唔好反口呀。    
我:嗯嗯。(阿紫...佢份人就係咁,求知慾非常之強既一個女仔   
我:係呢,就黎復活節假期,不如約埋阿力amy出一出去玩囉,唔駛咁悶呀麻。  
阿紫:都好喎,橫掂都算放好多日假下,你有咩想做呀?    
我諗左陣,講:不如,我地去燒烤囉!!!      
阿紫:燒烤呀,都好喎,我都好耐冇去過啦!不過我要問准屋企人比唔比先喎。  
我:冇問題,咁我後日返學同amy阿力佢地講聲先啦。      
阿紫:好啦。:

為左多d同阿紫相處,今次係我第二次主動約阿紫。 
回想返,其實當你鍾意一個人既時候,即使你性格幾被動(至少我係) 
你都會為左佢而改變,變得主動好多,大膽好多, 
當係為自己爭取機會又好,為左大家既關係又好, 
有好多野,都可以為你鍾意既人去改變,而自己係唔會介意。 
呢種魔力,我係個時先意識到原來係咁強大, 
難怪人地話愛情係盲目。係就係事後會覺得好傻,但至少個時,我覺得值得。

同阿紫傾完電話之後,個晚,我亦有好好諗過, 
其實阿紫絕對係信得過既人,講我屋企既事比佢聽, 
其實都唔係問題,只係我個時太細個,難免處理呢d事情 
既時候,會成日受負面情緒影響,所以先唔想多講.... 
各位巴打,有個齊全既家,無論有冇錢都好,已經比其他人好好多.... 

2 則留言:

Ebenezer 說...

要將件事講俾信得過嘅人聽....

明白晒,收到!

熱血宅男 說...

廣告feel?