2011年9月28日星期三

有一晚 一個來電.......... [(三)邁向戀愛的仲夏] - 11

我:喂... 
阿紫:....(佢冇出聲) 
我:喂,搵邊位? 
阿紫:阿樂... 
我聽到阿紫呢把聲,即刻個心都跳埋出黎咁濟。 
係就係好開心,好驚訝,但同時..亦都好唔開心.. 
心諗:佢仲搵我做咩呢.. 
我:做咩..(我反應都開始冷淡) 
阿紫:做咩你...呢幾日都冇搵我既.. 
(唉,你咪又係一樣..) 
我:因為..我真係好唔開心.. 
阿紫:對唔住呀阿樂,我知你真係好唔開心... 
   真係對唔住呀.. 
我:算啦..感情呢d野冇得好講.. 
  係唔鍾意就唔鍾意.. 
  咁你打黎搵我係咪有咩緊要事? 
阿紫:唔係...(我聽得出阿紫同時都好唔開心) 
   我打黎..係提你食藥架, 
   平時我都係呢個時間打黎提你架麻,你唔記得啦咩? 
(我當然記得,但而家性質都好似唔同左...) 
我:記得,我一陣會食架啦,你放心啦... 
阿紫:阿樂,你可唔可以.. 
我:有野咪直接講,唔駛吞吞吐吐喎。 
阿紫:阿樂,你可唔可以比少少時間我考慮.. 
我:點解要考慮?(唔通佢連自己都唔清楚對我既感情係點架咩) 
阿紫:我唔方便講呀..我只係想要多點時間... 
我:是但啦..即使最後你既決定係點,我都唔會怪你.. 
  (果刻既我,依然冇抱任何期望) 
阿紫:多謝你阿呀樂(佢終於開心返d).. 
   希望我地係呢段期間,都可以好好相處啦。 
我:嗯...(講就易姐,做起上黎....) 
就係因為阿紫呢個電話,我連自己都分唔清楚, 
到底我同阿紫既關係係點,只係覺得愈黎愈模糊, 
我唔係已經比人拒絕左架啦咩?點解,而家又好似仲有少少希望咁.. 
我真係寧願斬釘截鐵一點...

復活節假期好不容易過去,因為表白失敗,心情仍然未能平復。 
返學第一日,我集隊果時見到阿紫。 
阿紫依然用甜美既微笑對住我,就好似咩事都冇發生過一樣。 
係佢睇得開,定係我睇唔開? 
但我唔忍心,亦都唔想比阿紫覺得我仲係好唔開心。 
於是,我都盡量唔比阿紫感受到,其實我仲好介意。 
Lunch既時候... 
Amy:阿樂,你復活節過成點呀? 
我:下..ar...不過不失啦.. 
Amy:係咩?冇同阿紫出去咩?(佢細細聲同我講) 
比佢咁講一講,我真係唔知點解釋好,惟有避重就輕。 
我:有呀,出左去尖沙咀,食個飯,送左份生日禮物比佢咁囉。 
Amy聽到,即刻話:wow,sweet喎! 
然後佢即刻拍拍阿紫背脊,同佢講:阿紫,你就好啦,有人主動送生日禮物比你。 
阿紫回頭笑笑口咁講:係呀,份禮物我仲好鍾意添。 
然後阿紫既眼神就望實左我,我亦都望住左佢。 
一同阿紫有眼神接觸底下,果日既回憶又浮現係我眼前。 
我究竟做咩野..唔係話唔再諗架咩.. 
我即刻轉轉話題:咁你呢,amy,復活節又做左d咩黎呀? 
Amy:冇呀,同屋企人行下街咁囉。 
我:都好呀,當做下運動! 
阿紫:阿樂,你今日係咪要去補數學? 
我:係呀,做咩? 
阿紫:冇呀.. 
   咁你要好好加油啦,我會一直支持你架。 
(我睇得出,阿紫仲係好在意我同關心我。 
 唔知點解,雖然表面上睇阿紫好似冇咩野, 
 但我感受得到,佢真係好柔弱,好需要人保護咁) 
我:我會架啦。 
如是者,放學之後,我又要去我最唔想去既地方....

放學之後,我又好準時咁到左果間指定既課室。 
我一打開門,頂!例牌遲到佢又。      

沒有留言: