2011年9月1日星期四

有一晚 一個來電(一)回憶都是突如其來-16

阿紫:喂,阿樂呀!(語氣好開心咁講)

我:係。

阿紫:我睇左你份聖誕卡啦,真係畫得好靚好有心機呀。

相信大家都應該想知道,我送比阿紫張聖誕卡係點既係咪?

其實係聯歡會前一晚,我已經買左聖誕卡去畫。

係聖誕卡內頁入面,我用素描筆畫左個聖誕老人俾佢。

內容係話:阿紫,MERRY CHRISTMAS!

去泰國旅行記住要玩得開心D呀,手信買唔買都真係冇所謂。

     老實話你知呀,其實我初時入黎讀真係唔係咁開心架,

     都係識到你,阿力同AMY先比到咁多快樂我,令到我每日都過得咁開心。

     而你對我一直都咁好,所以呢張卡我都好比心機設計,代表我一番心意。

     希望你會喜歡啦。  阿樂

回到電話既對話。阿紫問:你以前有學過畫畫架?點解話得咁靚既?

我:冇呀,只不過係小學時成日都會自己無聊搵D野畫咋麻。

阿紫:咁你都真係幾叻喎,冇學過都畫得咁好。點解唔油上顏色既?

我:因為......(其實個刻唔係好想講 )

阿紫:因為咩呢?

我:因為我係有色弱,從小學開始美勞堂既時候,每次要上色既畫我都好低分。
  因為我唔識配答D顏色。所以,我只係畫素描,因為係黑白多。

阿紫聽完之後,話:SORRY呀,我唔應該咁問你。

我:傻啦,都唔關你事,你根本唔知道呀麻。

阿紫繼續講:估唔到你都同我一樣,初初返學時都係唔開心喎。

我:係呀,直至識到你先唔同D。(我個時唔知點解會咁直接)

阿紫甜笑左一聲:嘻,係咩。放心啦,我會令你日日都咁開心架,阿樂。

唔知點解,我覺得佢當時呢一句,真係好溫柔,我個心就好似溶化左一樣。

我好開心咁講:我都會令你開開心心咁過架。

就係咁,阿紫就準備去泰國,而我就準備去同同學踩單車。

唔知道,阿紫,去到泰國,會唔會掛住我呢?

聖誕寒假終於到,對一個中一生,個時無咩物慾既我黎講,真係唔知點過好。

好彩都有朋友約下我,唔係就悶到HIHI,所以我都好一向重視朋友。

朦朦朧朧間,我感覺到我臉頰帶點溫暖。我睜開眼睛,原來已經天光。

面上既暖意,原來係朝早既陽光帶比我。我當時實在好懷念,因為自從上中學開始,

就好少可以訓到日照三竿呢段時間。以前小學返下晝班真係唔識珍惜呢種感覺。

係我個腦係度諗:阿紫應該答緊早機了吧。

唔知道,坐飛機既感覺係點既呢...
唔知道,三萬尺高空上面既陽光,同係屋企比,又有咩唔同呢...

我嘗試係屋企望望天空,睇下會唔會有飛機經過。結果,一架都冇。
心諗:我真係傻,就算有,都唔會係阿紫個班。

食完午飯之後阿力打比我,約左我去沙田火車站等。

老實講,個次係我一生第一次,踏足沙田。
不過踩單車,我小三至小四個時已經學識踩兩輪車,所以難唔到我。
(不過我到中七果時依然識有D人係唔識踩單車 )

見到阿力同AMY呢兩個朋友熟識既面孔,我都好開心。

AMY:頂你,有冇搞錯呀。約你一點就遲半個鐘!

我:我都唔想架!第一次黎唔識路呀。

阿力:快D行啦,一陣好多人踩架啦。

同行幾人我地就去左租單車。

拎到單車之後,即刻上車踩幾腳熟練下,實在太耐無踩,好懷念。

阿力一拎到車,就講:喂,不如鬥快啦!

AMY即刻答單話:好呀,駛驚你,我實WIN架!

我:咁又係呀,你D肥膏係晒腳度,一定爆發力驚人!

AMY即刻駛個單車埋黎撞鳩我。

阿力:頂你兩個又係度灑花槍,唔理你地啦,我踩先。

AMY:喂,阿力!你咁茅既!想偷雞!?我唔會輸比你架。

就係咁,兩個人就先開始踩上去.....

我望住佢地既背脊,不禁笑住搖搖頭,真係冇佢地咁好氣。

心諗:或許,這就是青春吧。

1 則留言:

tonychui 說...

不如你講下自己野好過啦