2011年11月11日星期五

有一晚 一個來電.......... [(六) 熱戀中的暑假] - 10

買書果日,我就照原定係旺角地鐵站等佢。    
夏天不愧係夏天,真係熱到hihi      
我係書局出口果度等佢,唔知係咪因為暑假既關係, 
旺角人流真係多到呢,所以期後我一直好憎去旺角。  
又迫,又熱.....      
等左十分鐘,心諗:x佢!又遲到!!    
因為人好多,我就更加要落足眼力去睇下阿欣到未, 
睇睇下,咦!終於見到佢啦。        
我:好彩我見到你,    
  如果唔係你盲中中又唔知行去邊架啦。    
阿欣:咩姐!而家我又唔係好矮,點會見唔到呀!    
(阿欣佢今日著左黑色有點紮身既短袖衫,加一條類似牛仔熱褲) 
我:哎呀你遲到仲要咁惡死!好心你改下啦! 
  你既打扮就咁女仔,但你性格就咁男仔, 
  你令我有時真係有d精神分裂呀, 
  聽你把聲就男仔,睇你個樣就女仔。  
阿欣:我把聲邊似男仔(雖然真係唔似,仲幾好聽) 
   就算似都唔關你事啦!行啦!!嘈嘈嘈!      
我:唔好行住先啦,去七仔買支野飲先啦好唔好,  
  今日好鬼熱呀!!      
阿欣:抵你死啦咁熱仲著牛仔長褲。    
我:你唔係!! 
  一陣入到去你唔好買野飲!咁巴閉呀拿!    
阿欣係果一刻又向我伸一伸利, 
有時覺得佢都幾鬼馬。      
我地入左七仔之後…

我:呢d先係人去既地方架麻,有冷氣嘆, 
  你睇下出面曬到似咩樣。      
阿欣:超!驚咩姐你又唔係白底!    
我:白底!??        
阿欣:我指你個膚色呀,你諗左去邊呀咸濕佬!!  
我:你唔諗埋一邊又點知我係咪諗埋一邊?      
阿欣:哎呀,仲串串共呀!快d買啦, 
   你再唔行我一腳踢落去你度架啦!!    
我:唔好唔好...我行,我行。        
行到去凍櫃,我就買左支雀檸飲。  
點知..我見阿欣有所動作....    
我:哈哈,唔係話唔買野飲架咩?    
阿欣:車,我冇講過喎!    
我:做咩跟我買埋同一支!?    
阿欣:你理得我姐!我咁岩鍾意飲唔得架! 
   咩都要管架你!  
阿欣買完之後,佢就自己走左去收銀處比錢, 
咁我就跟上去,同佢講:欣姐,唔駛咁燥既, 
           我請你飲啦,咁夠心涼啦掛。  
阿欣笑住咁講:學精左喎,叻仔!!升中二果然唔同d呀!    
我:你識咩呀,呢d叫好男不如女鬥,費事有人話我冇風度。  
買完之後,我地就一齊走過去書局買書啦。  
行到書局門口,已經有一大班人係度聚集住。    
我:嘩,咁鬼多人既...      
阿欣:梗係啦,都月中啦,仲唔買等幾時買呀!    
   你估得我地呢間中學係呢度買書咩!    
我:得啦得啦知你醒啦!  
如是,我地排左一陣隊, 
就拎張書單出黎,叫果個職員幫我執書。 
我:唉,買書真係好貴...    
  雖然一年一次姐...  
阿欣:咁都無法架,除非你唔讀..    
我:邊有可能呀,唔好傻啦!  
阿欣:阿樂,聽講你d成績唔錯架喎。  
我:聽邊個講呀你又...    
阿欣:miss chan囉...    
我:(miss chan你真係好關照我  ) 
 我都係撞彩架姐,我想拎好d成績比媽咪睇呀麻。  
阿欣:阿樂,估唔到你咁孝順仔喎。    
我:盡自己本份姐,冇話咩孝唔孝順既,  
  遲d我都要養返佢架啦,而家唔讀好d書等幾時。  
阿欣:嘻,我欣賞你。    
我面一面紅:車,駛鬼你欣賞!  
正當我想飲野果陣,阿欣就好大力咁拍我, 
搞到我差d噴出黎。 
阿欣:鬼叫你頭先講錯野呀!      
我:你好彩,如果唔係我實噴晒落你塊面。    
阿欣:你試下!(阿欣少可咁嘟起個咀講呢句)
然後,我見個職員都執齊書, 
我地就分別去比左錢先。 
估唔到一次過拎d書都幾重..      
我:喂,你重唔重呀?駛唔駛我幫手?    
阿欣:得架啦,你顧掂自己先啦!!    
我見阿欣行果時個姿勢都比書既重量墜低晒, 
我實在唔忍心要一個女仔咁... 
唉,當我唔好彩啦真係!      
我:拎黎啦,麻鬼煩!    
  一陣你因為咁傷左就麻煩啦!  (然後我就幫埋佢拎) 
阿欣有點面紅咁,聲量開始細過正常講野:唔該你,阿樂..  
                   估唔到你都會為我擔心.. 

沒有留言: