我遇見了她-49

Christine返新工~

本來打算接佢返工，但係走唔開。Christine一到左新工作環境後，就send 個SMS比我講話佢已經有自己個位。嘉祺pass左D客佢跟，唔洗佢搵得咁辛苦。仲收到佢message 話今日股票又有斬獲。見到佢又開始投入自己既生活，做男朋友真係會好開心。可惜自己既工作卻忙過不停。原因係個客既貨一返來後，亦隨著工廠陸續開工，自己卻忙過不停。而係當中，同事亦紛紛議論點解我會成日OT。我深知道依D並唔係我能力上既問題!而係步驟上令到我要花好多功夫去處理。所以對於唔明白既人，我亦唔同佢議論或者解釋!因為任何人只係覺得自己係最好、最叻、最掂。我自問係自己既Dept係一個智多星。或者可能自己係某一D天份到比較好D。最開心係可以幫到同事解決一D最困難既問題! 但有時因為工作量，我都唔能夠處理得太多。

係Christine返左新工之後，同佢既接觸既時間，真係少左好多。點解？大家有冇睇過電視。當有一個父親或者母親發現搵返自己失散多年左既兒子時，好多時好想比返更多既時間佢地。Christine自從同Jenny、阿琼重聚後。原本佢100%比晒我，依家要將100%除5。除左我、Jenny、阿琼、屋企人、仲有係office hour後要見客。雖然我真係有D唔慣同埋少少唔舒服!但係我好明白佢內心依一種既心情，所以，我無炸佢型。講真，我自己掛住做野都唔能夠成日陪佢，又點可以怪佢呢？Christine既工作越做越好。單係佢第一個月返工既commission已經係我人工既十倍有多。阿琼一得閒就搵埋Christine去尖沙咀名店行街。Jenny成日叫阿琼，你自己去睇就好啦。唔好蚊埋Christine去啦。阿琼當然無理會Jenny，只係一句：搵得來洗得去。Jenny知道如果Christine咁做會好容易因為金錢就迷失左自己。所以，想佢係未踩得好深時去抽返佢出來。而Christine亦唔係迷失自己既。只係想去滿足一下自己既努力同埋辛苦得來既回報。Christine的確變左好多，並唔係對我既感情。而係係佢生命上面，已經攞返晒自己失去既感情、朋友、甚至工作上既鬥心。

復活節~

我同Christine都好忙~無時間見面，假期期間我要返工，而佢亦要出席D客既BBQ ，Party。去到假期最後一日我地先見面。依一日Christine上午約左個客去朗豪坊。而我就出去會合佢，但佢想去旺角GV睇戲。於是我去買飛。不過發生左件奇事，我做完都覺得自己好戇居。

依一日，我去度旺角火車站個一頭行，但係唔記得咩野事，突然間有一個操普通話口音既人不停蚊住D人。個個人都蚊，我諗住急急腳咁走，但係始終都係難逃一劫。

(依位普通話人著老西，都幾新光頸領)
普通話人：<先生~先生~幫幫忙？我遺失行李和金錢。可唔可以借5佰元給我？>
我：<吓~不如你去報警？>
普通話人：<甚麼？>
我：<um…呀~ 報公安呀？>
普通話人：<我沒有時間？我要趕住六點前到深圳機場飛到上海!求你做下好心，幫一幫下手。>
(吓~ 咁轉接既!點解唔係香港飛，有冇可能呀？仲要大拿拿5百蚊，坐埋上廣州都仲得啦。)
我：<吓~五百元那麼多。>
普通話人：<對呀~因為我在深圳邊託朋友叫了一輛私家車，所以真的十分需要這筆錢。我知道很難叫人借到給我，希望你的可以幫忙一下吧。>

比佢講多兩講，個人有少少心軟。亦諗諗下5百蚊雖然唔係大數目，亦唔係小錢。我都好矛盾下，不過諗深一層如果佢真係需要依筆錢。最後，我叫佢留係原位，我走去襟比佢。比完普通話人想走之際，佢叫我留返個手機號碼比佢，我當然唔想比佢啦，佢死都要跟住我，沿途好似D冤魂咁請左佢上來，送佢唔走，成條街都好多人望住。最後我都比埋佢。依件事後，我只係敢同阿文講，連Christine都唔敢講。佢知道後仲比佢話我~
阿文：<=.=”大佬~你比完錢都唔緊要啦!唔好連電話NO. 都比埋人嘛？乜你唔聽警方既呼籲咩？>
唉~ 我都唔知岩定錯。有時自己係單純，還是無知呢？我真係唔敢去定斷。

我同Christine除左星期日，基本上係無乜點見面，只係講一個鐘頭電話。今日能夠同佢出來拍拖。真係好難得。當同Christine見面後，我第一眼望佢真係同以前既品味唔同左。中環工作真係迫使佢要係物質上面要去追求，你用咩牌子既野都會影響到D人點睇你。所以Christine既改變係必然既。我同佢依一晚睇完戲食完返，係新世紀行左一陣就返去。返到佢屋企留下時，仲係樓下撞到Christine爸爸。同佢打左個招呼之後，佢顯然唔係太在意。畢竟內心對我既成見同埋想法係重未改變過。