我遇見了她-39

年初二~

9點半起身梳洗，10點半就去左Christine樓下接佢。我屋企打算會係十二點半食開年飯。今年我既屋企人當知道我同Christine拍拖。媽咪成日都好想見到Christine。不過，爸爸就唔鍾意。並唔係唔鍾意我拍拖。而係Christine既家景比我屋企好。加上佢搵錢多過我。所以，佢有咁既反應。雖然我並無向爸爸提過Christine搵錢多過我。但係爸爸向佢D同事講我女朋友既職業時，佢地有D仔女都係同Christine同行。話我爸爸聽個女仔搵錢多個你個仔。仲串佢：<你個仔就好。>所以，令到我爸爸內心都有條刺。而佢亦係好傳統既男人。成日都會同我講搵女朋友要木門要對木門，竹門要對竹門。不過，時代唔同左。依一D野係我內心已經係過時既野。我知道爸爸係出自一份父愛既關心。之不過係過度既關心，會構成好大既壓力。畢竟我已經係一個獨立自主既成年人。

到左Christine屋企樓下，佢一早已經知道我係樓下等佢陪佢去我屋企。佢見到我好開心，因為佢好鍾意我接佢既感覺。Christine想去APM地下間超市度買野拜年。我同佢講話唔洗啦，但係佢話第一次見我屋企人好想表示一D心意。我內心難以形容依一份心情。因為見到你女朋友咁識做。試問點會唔開心呢？佢揀左兩盒野，一盒係牛油曲奇、一盒係EDO牌既朱古力。然後排左一陣隊同理包埋D花紙就走。

我拖住Christine到我屋企樓下，Christine同我講咁大個女都未去過公屋。乜公屋有閘既咩？於是我地早左45分鐘到。就帶去到屋企附近兜一陣。我拖住佢同佢分享我對公屋既感情同埋睇法。

我：<Christine，如果我地無公屋住。真係成家人要訓街。(無奈~)我份人工係無能力可以去供一層樓。所以公屋係對我地依D人好重要。雖然係一D現今香港人既眼中係低下層，低收入，貧困戶。試問有幾多人能夠付擔得起一層樓呢？>
Christine：<點解唔試下諗居屋呀？>
我：<有諗過，如果我阿妹同我一齊供咪得。咁佢都要嫁。到時我一個人能力去供真係好吃力。>
Christine：<咁又係既~ 好彩我地層樓舊年已經甩左。如果唔係就大獲…我都供餐死。嗚~>
我：<唔係好多人好似你咁幸運~>
Christine：<^^ 我都知既~ 最幸運既係遇到一愛鍚我既男朋友，佢仲係好叻添!>
我：<吓~ 我一D都唔叻，叻既就唔洗咁啦。叻既就唔洗令你爸爸唔鍾意啦。>

Christine：<唉~ 有時都唔知點講比爸爸聽!講佢都唔明。不過咁~聞說我男朋友銀行都有廿幾萬儲蓄喎。應該可以係公屋富豪榜上榜喎。>

我：<=.=”你唔好講出去呀! 我會比人踢走架…^^>

同佢行左一陣就上我屋企，一開鐵閘時。我阿媽好似D女仔搶花球咁，立即衝埋去搶住Christine隻手來拖住。仲立即比封大利事佢。我第一時間望住爸爸既表情。睇下佢咩野反應。佢竟然偷笑。仲同我阿妹咬耳仔。我亦蚊左阿妹埋來。問佢講D乜野。