我遇見了她-37

2008年~

工作上，我突然間見到新既景象! 收到美國自己Office既Email話我有返個客。因為個客對於另一間公司服務不滿。並且點名要我跟返。對於本來係一個閒人黎講既我，當然係一個喜訊。不過就會好辛苦。因為資源不足。我要一個人去Handle。而Christine工作上終於頂唔順。問我唔做好唔好？我十分鼓勵佢依一個諗法。因為工作最困難既係人事，唔係工作本身性質。係大約1月10日晚上。收到阿威既來電。話嘉祺佢條Team要一個人。阿威想介紹Christine比佢。叫我問一問Chrsitine。Christine知道有一個機會。仲係大行。所以就當晚send resume過去。結果係星期六見工。並且成功埋。仲係1月14日遞上辭職信。終於解決左依一件困擾左咁耐既事。點解咁記得依一日，因為依一晚係阿靜生日。

但係Christine既爸爸始終好反對我同佢拍拖。但媽媽反而好鍾意我。覺得我品格純品，仲好錫佢個女。有一晚，Christine打來喊左成個鐘，佢爸爸話覺得搵都搵個有成就啦。文員仔點襯得起佢個女。加上佢家姐既男朋友係華爾街一個好頂尖既人才。所以Christine因為我承受左依D既壓力。雖然佢媽媽全力支持佢。只不過佢家姐越洋都對我地關係踩多腳。我知道佢爸爸同埋家姐都係出自對佢既一份疼愛。所以，我對佢爸爸、家姐係無任何既怪責或者埋怨。當然我內心真係好想去改變依一個局面!但係能力真有限。我自問唔係一個咁進取型既人。曾經真係有諗過想分手。但係我唔忍心同埋唔捨得。因為Christine除左屋企人，就只得我一個人可以信靠。

踏入二月份~依一個月係一個好忙碌既月份。除左農曆新件，仲係情人節準備殺埋來。同Christine之間既感情可以講話係好多既阻攔!但係我地既濃情仍可以抵禦!係整個一月份中，我唔能夠同Christine Keep度晚晚見面。只能一個星期見約三至四次。而每次係平日見佢時都係比較匆忙。

我差不多要晚晚OT。個客返返來，對於自己Team Manager係一個喜訊。但係對於同事係一個唔開心既消息!無人願意去參與。就算Manager開到聲也好。無人肯過來幫忙。雖然對我好唔公平。但係我也願意接受。因為依個客係掌控我係公司入面既前途。我突然多左好唔同類型既Email。好多都好有難度同埋複雜! 好彩Christine就係我既全自動翻譯機。教我點去用一D更好既字眼去回應。我上司同埋Manager都曾經出過Email話我英文進步同埋答得好。當時我睇到時，我好想同佢地講，英文無難度。因為我有補習天后Christine幕後代答嘛。農曆新年前，好多客趕住要出貨。所以，我要忙到年三十先可以停到。年三十今次可以早收啦，但係我都要六點先走到。而Chrsitine照舊收三點。