有一晚一個來電(一): 回憶都是突如其來的-1

文﹕食野唔走青

中五個年既會考，俾我負負碌碌咁係原校升讀中六

點解係負碌? 唔係因為我唔讀書，而係因為個時D屋企野實在太煩，

搞到我冇咩心機溫書 中六既日子，都係好平淡咁，繼續單身咁過

有一晚，D功課又係多到PK，做到個人都慶慶地，AL咁辛苦把春咩

突然間手提響，咁我睇都冇睇係邊個，就有D燥底咁講

我：喂 ! 咩料呀 !!! (其實部手提都係男仔搵我多，所以習慣左果種語氣
　　（利益申報：我唔係GAY )

??：嘩 (我諗佢嚇親)，做咩你變得咁惡既

我心諗：把女仔聲咁熟既．．．．．．．．．．．邊X個黎！？

我：你係．．．．．．．．

??：搞錯呀，咁都唔應得我把聲架（好明顯埋怨緊我），我係阿紫呀

我當時既反應係　 ＞ ＞ 　唔怪得把聲咁甜咁熟悉

我：唔好意思，對你咁惡添，我一開波冇睇邊個就接，估唔到係你打黎

阿紫：車！我唔搵你，你都唔會搵我架啦

我：唔係，近排中六忙呀麻（我仲唔啦啦聲兜咩，其實我係唔想搵佢）

阿紫：藉口！同你一齊個兩年仲唔知你份人咩！你都唔會掛住我架啦！

我：做咩冇啦啦又提返以前呢（我實在唔想再提起）

我再問：點呀你，升唔升到中六

阿紫：車！而家先識黎關心我。

我：係呀，咁講定唔講呀，唔講慳返。

阿紫：正一死人頭黎！講啦講啦。我升唔到呀，去左第二間重讀。

我見佢語氣明顯down左，我都費事再講呢個話題。

我：唔，唔好講學業既野啦，既然你一場打黎。

阿紫：算你識趣啦

然後，阿紫用好溫柔既語氣：係呢，阿樂，你記唔記得我地係點識架？

我：記得，中一個年．．．．．．．．．．

就係咁，回憶，都是突如其來地，被勾起了。

就係因為阿紫個電話，初戀既回憶再次從心底某個位置，被喚醒。