有一晚 一個來電(二)回憶仍在綻放 -15

休息左一陣，好快就到午飯時間。 
同學開始慢慢咁出去運動場附近度食，而工作人員就可以有免費飯盒供應。  
我見我自己都冇咩事，就從醫療室出去運動場大門果度等阿力ＡＭＹ同阿紫啦。 
我去到大門等左陣，終於陸陸續續咁見到阿力同ＡＭＹ落黎。    
ＡＭＹ：喂！阿樂！頭先好似見到你有唔妥喎，咩事呀！    
　　　　突然跑跑下咁慢既？    
其實我都會估到ＡＭＹ咁問，我都有晒心理準備點樣答。  
我：冇，突然跑跑下胃痛姐，衝線果下唔小心失足咪整傷左個膝頭囉。 
阿力見我咁講，即刻好急咁問：下，你頭先整親咩？點解我唔知既！？  
我：哦，可能你比緊賽，唔知走左去邊掛。    
　　少事姐，冇咩野啦而家都。    
阿力留意到我個獎牌，即刻話：死仔！係勁喎！    
　　　　　　　　　　　　　　拎到個跳遠銀牌！    
我：勁鬼咩！好彩姐！ＡＭＹ咪仲勁！      
　　可惜短跑拎唔到啦．．．．．．．      
阿力：慢慢啦，而家先係你第一年陸運會。    
聽見阿力咁講，我真係好想同佢講：唔慢啦，我驚以後都冇咩機會再參加呢Ｄ短跑。 
　　　　　　　　　　　　　　　　至少，我未必再有膽量再做．．．．．．    
ＡＭＹ：係啦，阿樂！你下年再努力過啦！  
　　　　我下年跳遠實拎到牌比你睇架！    
　　　　唔好講咁多啦，快Ｄ出去食飯啦，好肚餓。    
我心諗：頭先先食完魚蛋冇耐，又肚餓！？      
阿力：咪住，阿紫呢？唔駛等佢咩？    
我：好多同學都出晒去，都仲未見佢出黎，可能佢都要排練， 
　　我地都係唔好阻佢啦。      
阿力：哦，咁行啦！ 
一路行，阿力一路問：頂！度度都咁多人，又好似冇咩好食咁．．．．  
ＡＭＹ：咁呀，唔好晒時間啦，就呢間茶餐廳啦！我地得返唔係好多時間。 
　　　　（得一個鐘食晏） 
我又冇咩所謂，就答應左。

食飯時候，我地當然不忘吹吹水．．．．． 
ＡＭＹ：啦啦隊有冇咁辛苦呀！之前放學已經見佢地係咁練， 
　　　　到左呢日仲要係咁練，連食飯時間都唔放過添！  
我：係呀！所以你下年都係咪制啦，以你咁一定頂唔順！  
阿力：哈哈！唔係下話ＡＭＹ，你都想參加啦啦隊？    
　　　放心，有你係度我到時一定唔會捧你場！      
我：哈！拿ＡＭＹ，唔係淨係我咁講架，你都係死心吧啦！      
ＡＭＹ：去死啦你兩個，一Ｄ鼓勵既說話都冇既！      
我：阿力，一陣到睇你表演啦！四乘一百接力你要加油！  
ＡＭＹ：咁你同佢定都得啦！佢拍晒我地班Ｄ勁人，好大機會WIN！  
阿力：咁又係呀！四乘一百接力真係濕濕碎！實拎到個金牌比你睇！ 
　　　放長雙眼啦ＡＭＹ！        
我：唉，阿力，有時真係幾羨慕你！咩都參加得！運動又唔錯！  
阿力：有咩好羨慕，你都得架姐！    
聽阿力咁講，我真係有點心UP，其實．．我並唔得．．．．．      
見野食黎齊，我地都快快手手食野，返返去睇阿力同阿紫個兩場比賽．．．．．

食完飯，我地都返返運動場，又係各自各返自己社果度坐啦！ 
等下等下，好快就已經黎到阿力比賽個場。 
為左睇真Ｄ，我決定落去運動場旁邊睇，唔係看台睇。 
當我行過ＡＭＹ個社時，我都向ＡＭＹ招手示一示意叫佢落黎。 
ＡＭＹ落到黎，問：做咩呀阿樂？    
我：冇呀，不如我地落去運動場果度睇啦，咁樣會清楚Ｄ同刺激Ｄ。  
ＡＭＹ：都好喎，咁行啦！！    
於是，我同ＡＭＹ就落左去睇！ 
估唔到，初級組既四乘一百接力人氣係咁勁。 
比賽未開始，Ｄ歡呼聲已經落駱驛不絕，勁過短跑多多聲。  
難怪咁多年接力賽一直係人氣高企既比賽項目．．．  
我究竟，幾時先再有機會可以試下．．．．．．．．．    
我見阿力果隊都各就各位，分別去晒４個唔同既地點等開始， 
而阿力就係做最後一棒，即係衝線果個！    
我比左個手勢阿力，示意叫佢加油。    
四乘一百，真係好講求默契，如果．．．． 
我都可以落場就好．．．．．簡直係男仔見證友誼既表現！ 
好快，各個隊員都各就各位！阿力果隊係跑二線，總共有六隊。 
雞聲一響！每隊既隊員拿掐既時間都好準確，係千鈞一髮之間搶先起步， 
爭取每一分，每一秒，甚至每一毫秒快過對手既機會。 
阿力果隊既第一個隊員表現都算不俗，雖然唔係最快，但正處於第二名。 
心諗：仲有得追！！      
過彎位準備交棒，果然，默契好夠！交棒動作快而利落。  
第二個隊員亦應棒跑出，佢跑既途中我都好驚訝！！    
真係好快，可以見到佢爆發力驚人，而家已經追過頭先第一名既一線隊伍！  
心諗：好！！只要以下落黎冇咩差池，金牌真係志在必得！！    
雖然過左一線個隊，但只係快佢地少少，兩隊實力真係旗鼓相當。 
直路爆速之後，又黎彎位交棒。 
我諗住會順利交棒，點知係呢個時候犯左一個好嚴重既錯誤．．． 
跌棒－－－－二號交去三號既時候，果一下應該接空左，唔小心跌左棒．． 
我：嘩！今次真係PK啦！！