我遇見了她 -6

原來……佢八達通有無晒錢，我聽到佢同司機講話只係得張一百蚊。而司機既態度唔係咁好。仲叫佢企埋一邊。唔好阻住塊鏡。我當然好主動咁行埋去啦。
我：<司機，唔洗咁惡既!人地都唔想。等我幫你比啦。>
Christine：^_^ <唔該晒你呀!>
我：<算D乜野呀。>
我有D想問個司機可唔可以找錢，因為我放左十蚊入去。但係有女仔係度我梗係唔可以咁失禮啦。唔知點解？我同佢既見面，總係大多數係好徬徨無助既時間之下。就會出一出現。而我同佢都會幫一幫對方。今次見返佢，我真係有少少做左英雄既感覺。或者，可能我已經成為佢心目中既英雄呢!我同佢一齊上左樓上坐。今次架車唔會只係得單邊位啦。
我：<依…你仲乜咁早既?>
Christine：<唔好提啦…今日要去promo Credit Card，仲要去到中環。你呢？咁早既？>
我：<約左朋友去南丫島玩。>
Christine：<你就好啦! 我都好想放假去玩呀。>
我：<我間唔中都會同D朋友去離島玩架，你唔介意下次叫埋你囉。>
Christine：<好呀…我無乜所謂。>
(當聽完佢咁講，我真係好開心^^)
我：<依…你住邊架？>
Christine：<藍田匯景花園!>
我：<咁點解唔搭地鐵或者603既？>
Christine：<我阿姐叫我早少少出門口去開源道間分行攞少少野比佢喎。>
我：<唔怪得。>
Christine：<我又大頭蝦，八達通無錢又唔記得左，身上又無散紙。得張五百同一百蚊。好彩遇到你渣。>
我：<算D乜啦! 我同你都幾有緣喎!>
(其實有少少肉赤，無理由益九巴。我都係一個算係幾孤寒既人。^^>
Christine :<係囉…觀塘都好大下。仲返返下工都撞到。>
我：<哈哈，我都估唔到呀! 依……你電左頭髮喎？>
Christine：<係呀! 係唔係唔好睇呀？>
我：<梗係唔係啦，好好睇呀! 仲好襯你添。>
Christine：^_^ (佢有少少面紅^^)
我：<我返到來香港時，真係有買過手信俾你架。但係你轉左Office呀!>
Christine：<係呀!乜我無同你講埋咩？我講左話我遲D咪唔洗咁早返工囉。>
(=___=””” 點會知道原來係依個意思!當然我好有風度。)
我：<哈哈哈…原來係咁既意思呀!我以為你唔洗咁早返工添。點解會掉既。>
Christine：<我個職位係咁，成日轉DEPT。我係個半月後會轉去投資部呀!>
我：<吓…咁快會知。>
Christine：<差唔多啦…你做咩架？>
我：<我做物流架。>
Christine：<做左好耐架。>
我：<係呀! 今年岩岩十年。>
Christine：<嘩…你咪好大個。個樣唔似喎。>
我：<我十八歲就入行架啦。所以讀書唔多。>
Christine：<吓…有乜所謂呀!讀到書又好，讀唔到書都好，最緊要心地善良。我覺得你係一個好人。>

(我有少少唔自然，其實係飄飄然就真)
我：<我又唔覺喎。星期六我從來唔買旗架喎。>
Christine：<哈哈…咁都唔代表你唔係好人呀! 記得第一次見同你見面時，其實我真係好無助同埋徬徨架。我當時入去渣打襟錢。一出來就係好大雨。真係唔知點算。只係見到D人擔住把遮，走來走去。我等左成十五分鐘都D雨都無細過呀!我諗住打比屋企人叫佢來接我架。點知你肯遮埋我喎! 如果你唔係一個好人，又點會咁做呢？>
當聽到Christine講返當晚情景，我內心特別有一種味道! 係咩野味道？當然係甜啦。我咪咪咀係度笑。只係做過一件舉手之勞既事。能夠成為一份咁美好既回憶。