熱血艾特的生活點滴

2011年12月17日星期六

我遇見了她- 22

依一晚，Christine 既眼淚一滴一滴咁留。係究竟佢想起自己既辛苦，還是感動呢？我唔敢問，畢竟我內心都係一件唔敢去話佢知。我每次同佢出完街，每次都會送佢返屋企。不知不覺成為左我地每次活動既最後環節。同Christine再度相遇後～約一個月，阿威、阿文每一日都會推一推我叫我同Christine表白，再加埋佢地女朋友一致認為Christine係已經會接受我。其實我都好想，但係我好怕失敗，如果真係失敗，我同Christine連朋友都無得做。點算呢？
每次我遇到依D煩事，好難同D兄弟去講。雖然佢地都好關心你。不過過份既關心有時都會增加你既壓力。所以唔能夠明白我內心依一份既感受同不安。我又再次打比阿靜。

我：<阿靜呀~我好唔好同Christine表白呀。>
阿靜：<呵~~乜你唔驚咩？>
我：<好驚呀!所以唔知點咁？>
阿靜：<你係唔係表白左後，佢唔接受你，就連朋友都無得做呀？好怕失敗要承受個結果呀!唔可以好似依家咁？>
我：<係呀~>
阿靜：<你係唔係又怕如果唔表白，你又覺得自己好無用？好似有Ｄ野騙緊Christine唔自然呀！>
我：<係呀（有Ｄ驚喜、因為佢講中）你點知架？>
阿靜：<^^乜你唔知女人既直覺好準既咩？你暪過我雙眼架。>
我：<靜呀～我係唔係好無用。>
阿靜：<傻啦～關咩野啦。你做得好好呀！你諗下家下Christine已經係你身上得到一份支持。點會無用呢？>
我：<但係我鍾意人，都唔敢向佢表白喎！>
阿靜：<你知我一向都自己既睇法。依Ｄ只係一Ｄ人在乎結果同答案既答法。Wind，緣份真係好似你咁，唔洗刻意去做，只要在乎一份自然、流露出來內心既真挈。如果太多人為因素同埋計算。就已經失去左好多意義。Wind、順其自然啦！時機一度，你唔做，佢都會走埋來。＞

人生你會有好多既朋友。每一個朋友都會有佢係身上既期望～好似阿威、阿文。好想你快Ｄ拍拖。而阿靜呢？佢係一個好知道你處境既人。我同佢傾計真係好舒服！亦每次總有一種得著，係佢身上，真係學識好多野。所以，我又無再理會兄弟叫我同佢表白既事，而係好舒服咁同Christine享受同佢之間既相處。

有一日放工，Christine打比我問可唔可以同佢星期六去銅鑼灣。佢好想去睇燈飾。因為聖誕節都好快到。佢想早Ｄ先去香港個邊睇。我當然無問題啦。我都好想同佢一早咁做。因為聖誕節總係比到一種特別普世歡騰、浪漫既感覺。真係令人特別開心。係未識Christine 之前，依個節日對我真係無乜太大特別，只係一個可以讓我休假既日子。我甚至乎有少少妒嫉、憎惡依個既日子。因為，我有其中一個女朋友，都分開左好耐。大約係聖誕節前分左手。然後又係聖誕節同返佢之前既男朋友一齊。對我都有少少既影響。甚至乎令到我真係想係聖誕節前一個月閉關不出門。雖然阿威、阿文都會叫我出來。作為佢地既大佬都會係每年２５號出一出去交換聖誕禮物。今年真係好唔同，因為，我搵到一個人去可以同我過。緃使佢唔係我女朋友。而係我單方面。

到左我同Christine約會當日。我同Christine約會係藍田地鐵站車尾等。而當日佢要返工。所以放工要返一返屋企先出來。自從我識左Christine 後，學識左守時。以前次次出親街都會比Ｄ兄弟成日話我依方面既野，有時都表現出好不滿，就算我點改，都改唔到。反而依家，我就自動自覺咁改。真係神奇。
隨著同Christine去街多左，每次去等Christine，無左以前既咁緊張。可能同佢已經熟絡左，不過等佢既時間都會好想快Ｄ見到佢既出現。我等左約15分鐘，佢出現啦。我呆左…因為今日真係好靚。除左化妝，還有著左一條裙。我第一次正式見佢著裙加一對高踭鞋，視線同我平排。平時既佢一向鐘意著牛仔褲。所以真係令我好著迷。

Christine：＜^_^等左好耐呀？＞
我：＜唔係～＞
Christine：＜仲乜呀？唔好睇呀？＞
我：＜唔係呀～你今日好靚！＞

Christine聽完我讚後，比左一個好開心既笑容回應我。咁大個仔，真係好少依見到一個女仔悉心打扮去見你。我覺得自己好幸福！不過，內心既自卑又提我唔好咁諗。女仔打扮係比其他人睇，唔係比你睇。你何得何能去影響到人呀。有時都唔知依一把聲音係好定唔好。或者清醒Ｄ，自己會無咁傷呢。我隨即將自己認為既事舜間去掃去。我地好快去左銅鑼灣時代廣場對出位置。人頭湧湧。基本上寸步難移…好辛苦先行到出一群。

Christine：＜嘩…好多人呀？＞
我：＜係囉…不過都好有臨近聖誕節既氣氛！＞
Christine：＜係呀～我每一年聖誕節前都會來一來銅鑼灣架！依度真係好靚。^^＞
我：＜你餓唔餓呀？＞
Christine：＜餓呀！去邊度食好呀？＞
我：＜靜靜地話你聽？我唔係好識依度Ｄ路…成世仔只係識九龍Ｄ路，一到香港同新界區我就會迷路架。＞
Christine：＜咁點算呀～我都係咁架。仲要係全香港…^^＞

我同佢傾得太投入，佢掛住望我，仲行左出馬路無睇到有冇車，我就立即好自然既反應係捉住佢返來。仲唔小心捉住左佢隻手。

2011年12月16日星期五

我遇見了她-21

當局者迷，我覺得好能夠形容到我既處境! 真係好貼切。我同Christine係依二個星期日日見面。晚晚一齊食飯。依一種約會。真係令我自己覺得好似戀愛咁？有時好難去解釋依一種心情。依一刻，愛情好接近自己，好似係手邊咁! 但係以前，我都曾經以為係，點知？往往就會走左去。好似一種同極磁石咁，當一行近就會彈得好遠。人就係往往咁，越想擁有，越在乎結果。就會失去左方向。所以，阿靜依一段時間，每同我講話時，特別去提我要離出來在乎結果既心。去諗更多關於Christine既需要。盡量去低自己既期望和感受。而Maggie同Fanny亦會當我D兄弟拍拖時，當我打去時，佢地就會搶佢地既電話：同我既勉勵一翻!
我同Christine既話題、一日比一日多，自從談到佢個過去，到家下現實生活既大小瑣碎事。佢都好似有線24小時新聞台既主播咁立即向我報導~ 雖然係佢工作時間，只係SMS 比我多，但放工就會一口氣講晒比我聽。而我每次好享受佢既任何一句同我既說話。當星期日同佢地飲完茶，我時不時都會去諗，點樣去建立自己既回憶？我雖然明白，但始終諗唔通點做，好彩依D時間，仲阿靜係我身邊為我解說。

我：<靜呀~ 點樣去建立我同Christine之間既回憶？>
阿靜：<Wind~~我咁諗。只要係關於你同Christine既任何一件事，就係等如你同佢既回憶。>
我：<阿靜，我覺得人生裡，總係我最諗唔通時，你都會一針見血。一講我就明。>

關於我同Christine既事？真係太多，仲要係越來越多添! 究竟我同Christine之間，有幾多既共同回憶係屬於我同佢呢？
我真係有為依件事諗左好耐，但係真係諗唔到。
有一日，我踏42C 係觀塘落車，於是就走到過一條冷巷，見到有一間涼茶鋪!我停低左，因為想見到廿四味。突然之間想想第一次真正同Christine 既約會情景。於是飲左一碗。我未識Christine之前。我一定唔會咁做。因為依種既苦，我真係唔能夠接受。當飲完依一碗。其實都係覺得好難飲。不過依一種苦更令我想起Christine。我突然間有一個靈感出左來。於是立即打比阿文女友Maggie。佢一定幫到我。

Maggie：<喂呀~大佬! 仲乜搵我既？>
我：<唔好意思呀？我想請教你一D野呀!>
Maggie：<唔好咁講啦…你想問D乜野咩野呀？>
我：<你識唔識用紙粘土整廿四味呀？>
Maggie：<嘩~~ 咁難架。我諗整左出來會唔好睇喎。>
我：<吓~~咁有咩野方法去整呀？>
Maggie：<Um……呀! 我諗到呀!你可以買個細膠樽。然後就買人地玩氣槍既BB 彈入滿。再用係電腦打D字，用Label紙咪可以print 出來”痴”係個樽度，上面寫上廿四味。咪似一支廿四味囉。>
我：<嘩……阿文真係幸福，你一個咁叻既女朋友。>
Maggie：<你送比Christine呀？>
我：<嗯~~>

由於經Maggie教路之下。我就好快去整到出來。
而到我地相遇接近第三星期既一個週未，同佢去係APM睇完戲，食完飯。時間大約十一點。佢又唔想咁早返屋企，於是我同佢就去左一度地方。就係觀塘碼頭。我同佢行到一度好多石既地方。佢行得有少少”論””盡”。我就去扶住佢慢慢行。大約行到中間，面向舊機場位置。於是就坐低左。

Christine：<你成日來架。>
我：<唔係呀!>
Christine：<我住左觀塘都好耐，都唔知道有達咁既地方。>
我：<吓~~ 乜你唔知咩，D人成日係度拍戲架。>
Christine：<唔怪得知咁熟口熟面啦。你係唔係夜媽媽成日帶D女仔來依D地方度。>
我：<=.=”其實依度係我一處傷心地來架。>
Chrsitine：<吓~~真架？點解既？>
我：<曾經有個女仔同我拍過散拖，跟住係度飛我囉。>
Christine：<乜你咁花心架…我咁大個女只係同Wilson拍過拖。無其他男朋友啦。>
(唔知聽到Wilson時，我個心係有少少唔舒服，我真係對佢既感覺越來越深。)
我：< =_=”我咁既樣，係花心唔起架。你又再次提起我D傷心事。>
Christine：<唔好意思呀! 我講下渣…無啦啦會分手既。>
我：<我成都係咁，除左第二個女朋友因為異地戀而和平分手，其餘都係有第三者介入。>
Christine：<唉……第三者。>
(其實我講錯左野~依個字對Christine來講係一個傷口。)
我：<Sorry~~我講錯左野。>
Christine：<關你乜事啦~ 其實都過左去啦，忘記背後嘛~>(望一望我)
(我個心好甜，佢竟然記得我既SMS)
我：<Christine呀~>
Christine：<做乜呀？>
我：<我有D野想比你…>
Christine：<又送野比我^^？>
我：<(UP 頭)嗯~~不過要你閉起雙眼先，唔準偷望。>
Christine：<咁呀~會唔會借D意掉我落海呀!>
我：<哈~ 咁你閉左我就唔掉，唔閉就立即掉啦。>
Christine：<嗚~~~ 乜家下D人成日虾我D衰質女子呀!話晒都係女仔來啦。>
我：<=.=” 咁算我唔岩，算我唔著啦…你乖乖地閉啦^^>
Christine ：<咁呀~~好啦! (閉左) 得啦~>
我：<咁你伸隻右手出來先>
Christine ：<得啦~>
(我遞個背”郎”比佢，因為支廿四味係入面)
我：<你摸D乜野呀？>
Christine：<(佢單眼) …背”郎”囉…)
我：<唔準偷望呀! 唔係~ 係背”郎”入面。>
Christine：<^^UM…….摸到…係一枝野來喎。>
我：<^^ 係啦…咁你拎出來啦。>
Christine：<哦~~知道!>
我：<你可以望啦!>
Christine：<^^ 依~仲乜送支廿四味比我呀!>
我：<比你送囉~>
Christine：<^^係唔係咁飲呀!點解支廿四味有咁多珍珠既~>
(佢無開蓋，成枝放係個咀到飲。GOO GOO 聲扮飲~)
我：<=.=”唔係咁飲架…>
Christine：< >.< 點飲架…唔係用口飲既咩？>

我依個時候，一早已經預備左個細紙袋。就叫Christine將D BB 彈倒入去。佢就照住我指示去做。Christine倒到D BB彈咁上下，突然見到將紙。

Christine：<有張紙既…咩野來架(望一望)>
我：<你睇下咪知囉~^^)
Christine：<嗯……(佢望完又眼濕濕，因為我寫左四個字：苦盡甘來)>
我：<^^ 除左忘記背後，仲有苦盡甘來>
Christine：<(UP 頭) 係呀~Wind….我好耐未感受過一個全心全意對我關心既人。多謝~)

2011年12月14日星期三

我遇見了她-20

Fanny：<大佬，你既邂逅真係好特別，真係好令人羡慕!>Maggie：<真係無諗過真係會發生依D既事？阿文…你要學下大佬對Christine既關心啦？>
阿文：<=.=”你咁都可以燒我地依疊度呀!>
Maggie：<女人就係咁架啦! 乜都撈埋來講架啦。>
Fanny：<又啱喎! 女人真係咁架喎。>
我：<咁女人會唔會介意個男人係能力方面差個自己!好似我咁？乜都唔叻，而Christine就係岩岩
相反。樣得、學歷得，仲搵錢多過我。>
Fanny：<大佬…男人先會咁諗野？女人唔係咁諗野架？>
Maggie：<係架？女人真係好簡單! 條件只係比女人一個藉口。但好多時感覺一度，就會乜都會唔理。>
(阿威、阿文好留心聽。相信佢地都好少聽女朋友講女人心事。)
我：<感覺？其實我真係唔明？>
Fanny：<你知道嘛？如果我係Christine一定會好感動。仲要係依D咁巧合既情況下。發展到今日。我一定會同你拍拖。>
我：<^_^你地係我朋友，梗係咁講啦。>
Maggie：<大佬…女人要既野，就好似你咁做既野？>
我：<我咁做既野？>
Maggie：<就係一種依靠。一個無助既環境下，有個愛自己既男人比個膊頭自己。可以陪佢喊。唔開心，可以講笑話氹佢。>
Fanny：<好到point! 係依D啦~大佬，起初佢真係當你係普通朋友，搵你傾下電話，去下街。陪佢攝下時間咁。不過相信過左琴晚之後。佢對你應該唔止依種感覺!>
我：<唔止依種感覺？即係點呀？>
Maggie：<哎呀~ 好難去講得你明架。因為依一種感覺，係好虛無。唔係用個口講，係用心去FEEL架。簡單D~女人就係只要你全心去關心愛護佢，咩野情況之下都同佢一齊去面對。就算開唔開心都可以成日陪住佢。

(佢望一望住阿文)

就係咁簡單。你唔好用咁多理性去分析。點解？點解？或者一定要1+1=2咁。愛情係無定律、無一定。>
Fanny：<Maggie~ 你依句：愛情係無定律、無一定。真係簡而精。大佬Wind~全心全意愛一個人，唔好諗咁多。女人要既就係你個心、女人要既係一個全心全意愛自己既男人、只要個男人不顧一切為自己付出。依個女人可以放棄一切外在條件。>

以前，我係感情遇到困難只係搵阿靜去傾。因為阿靜係可以一針見血去將整件事既來龍去脈仔細同我講。我好多時混亂之中。
佢都可以令我走過咁困難既時間。因為阿靜經歷過既難關，真係唔係好多人可以佢咁堅強。今日，我依兩位細佬既女朋友講D女人心事我聽。所有感情既核心，就係來自就全心全意咁去為一個人。
我同阿威、阿文都係一樣用依種形式去維繫! 我記得98年大約四月~~開始同阿威、阿文成為兄弟。係義工組入面!大家開始好投入。我諗當年我地好年青人啦，要去服務未期癌症病人對於岩岩出來做野既我，同埋讀緊書既阿威、阿文，真係好有難道。我地義工組約十一、十二人都係同我地年齡相約。evh 當時好多人有懷疑過我地組既能力。但係年青人既最大優點就係潛質無限。同樣經驗不足亦係一個好大既缺點。做依一類服務!一定唔可以講錯說話或者表現唔成熟。我地好想證明自己係可以做到。所以，我地三兄弟都係組裡十分落力。(我不能寫得太多機構內容，因為係做義工時對機構及病人既承諾!所以只可以談到依度。)
因為咁我地三兄弟就係當中由一個義工組入面既支持，到生活上既互相關心、照顧、彼此既激勵!
點解成為兄弟呢？主要發生左兩件事。
第一件事係關於阿文。當年佢鐘意左組入面既女仔叫Stella。當見Stella第一次眼時，阿文仲係度同阿威埋怨：點解D組員咁扒既。唔會唔會嚇親D病人。當時佢地好唔鍾意我。後來同我熟左。由於阿文佢份人比較容易鍾意人，佢同Stella合作多左、日見夜見。跟住就鍾意左人，至今成為我同阿威既笑柄。依件事，由於我地多左經歷，阿文漸漸係我身上多左份依靠。並且覺得我好似一個大佬咁關心佢。
第二件事係阿威學year one受了一次好大既挫折，當時佢被一d大學針對。我覺得有少少玩手段。阿威好失望？點解人可以咁？可以為左利益、可以去針對任何人？點解唔可以公平？一時之間對人失去了信心。依一晚，我同阿威坐左係沙田大會堂上既留梯上。同阿威講：

我：<你變左？>
阿威：<變左D乜？>
我：<你變得更識得關心人!>

成個問題係關於人! 我同阿威講，如果無依班人既行為，今天既你係唔明白每一個人既感受。你去受，只係令到你更加既豐富。只係令到你更加明白體會別人既痛苦。做義工改變左你既思想。阿威以往只用一件事去判斷任何人。當然今日既佢依一個模式都無變，但係多左份人情味。尤其對我同阿文。阿威覺得就算自己受左挫折。都會有我係佢身邊扶佢起身。
依兩件事~~對於阿文、阿威來講好重要，因為佢地感受全心全意係為一個人、或者被人為自己付出。所以，成為我地三兄弟好重要既一個基礎同核心就係一份來自心底裡既無條件關心，就算我地從不講出口都好!都可以感受到依一份既溫暖!其實唔止愛情、基本上所有感情都係無1+1=2 、無定律，無一定。

Fanny同Maggie令到我上左寶貴既一課。讓我學識女人心事。相信得益既唔止我一人，還有阿威、阿文。
到去到飲茶既尾聲。Fanny 同Maggie講左D更令我好深刻既野。

Fanny：< 大佬~~ 好想同你講多一樣，愛情，係對於每個人來講，係屬於一個獨一無二。就算經歷係相似，但係唔會係一無一樣!無論乜野都好，依個回憶、片段係屬於你自己同埋心愛你既人。所以，你要同Christine建立一個屬於你地自己回憶。>
我：<Fanny呀~ 我唔係太明？>
Fanny：<回憶! 就係你對佢今日所做既事，當過左去。依件事就係成為回憶。>
Maggie：<嗯~~ 你付出得越多、越用心。對方就會越深刻。一切就係你眼前為佢做既一切。>

我覺得兩位兄弟今次真係無揀錯! 從Fanny同Maggie身上，令到我感受到一件好真實既事。就係佢地已經擁有左屬於自己既回憶。
我地傾左好耐，飲完荼都成差唔多3點，之後就各有各走。我真係我仲未收到Christine電話。我估佢應該仲未起身。但係有心掛掛，於是我就懷疑依個會唔會係個原因。唔知有冇其他人試過好似我咁。

阿文：<喂…點呀!>
我：<無~~我試個電話，唔知道有冇壞到？>
阿文：<無理由呀？今朝咪打過比你叫你出來囉。>
我：<哦~ 我試下啫，同你地講完之後，成日電話都無響過。>
阿文：<咁呀~ 我試下打返比你啦。>

其實我只係擔心個電話有問題，Christine打唔到比我。但係又唔敢同阿文講，男人始終都係要面。大約5點度，終於收到Christine既電話，佢岩岩訓醒。佢問我得唔得閒同佢出來同佢食飯。我答應過佢，去到天腳底都會陪佢。所以，我地就約左主場APM 度食飯。仲等左佢兩個鐘添。

2011年12月13日星期二

我遇見了她 -19

我講完後，就聽到Christine係電話到喊，我諗珍貴無私既友情，對每一個人都好重要。縱使見到流星既事係假。但Christine對佢依兩位朋友既真心，係一個事實。

Christine：＜Wind～多謝你!!我都有D野想講你聽。不過依家唔講得住。＞
我：＜嗯~~好呀！你想講就講啦^^~依~~太好啦～有的士喎…＞
Christine：＜快Ｄ截啦。＞
我：＜知道！＞

其實今晚真係突然間挑起左佢好既回憶。人就係咁，好多時當你被人挑起左出來。要再放返入去真係唔容易。我知道Christine覺得因為我陪佢既緣故。令到我冇車返屋企。內心真係存在著唔好意思，雖然路程唔算太遠。而我約二十分鐘後我就返到屋企樓下。Christine先肯去沖涼。我都好耐未試過，同一個女仔去街去到咁夜，然後仲送埋佢返屋企。而今晚雖然見到Christine既眼淚，好似針咁刺落我內心咁!佢既經歷，成為左我內心入面既一部份。以往只係兩個人既事。今晚以後，佢既事就係我既事。成為我世界入面不可分割既一部份。
臨訓前，想起一句說話，於是我就SMS比佢：

＜忘記背後，努力面前的向著標杆直跑。＞

我訓到第二朝早十點，比個手提電話搞醒左：

我：＜喂…＞
阿文：＜大佬…早晨喎！＞
我：＜點呀！仲訓緊喎～＞
阿威：＜醒下啦…光陰似箭。＞
我：＜我仲好眼訓。＞
阿文：＜我知我知～二佬威，你無左住大佬訓啦，隔離一定訓左Christine係度。＞
(聽完依句話，我成個人比佢地激醒左。)
阿威：＜嘩…唔怪得之咁累啦。＞
阿文：＜係既…大佬佢體弱多病，仲要佢咁操勞。叫佢比時KEEP 好D架啦!未老先衰。＞
我：＜你地再講我聽日係生菓日報頭版見呀!＞
阿文：＜吓~點解呀？＞
我：＜我將成副身家攞去登頭版同你兩個斷絶兄弟關係囉！＞
阿威：＜大佬Wind…唔係為左條女咁對待我地兩兄弟嘛？＞
我：＜唔關Christine事，係關你兩個懷疑我能力方面問題既事。＞
阿威：＜呵呵～單野唔關我事，係阿文講渣。＞
阿文：＜=.=”哦～又係我！＞
阿威：＜大佬～快Ｄ刷牙洗面啦…我地出來飲荼呀！＞

一早比佢地搞醒，成個人都仲未還魂。九成九叫埋Ｄ女朋友出來係供下我琴日做過Ｄ乜啦。佢地有時真係仲痴身個Ｄ女仔。
尤其係阿文。於是，我就出度去會合佢地，地點唔需要多代交。因為永遠只得一度。我去到酒樓。真係四個人。

阿威：<大佬…好累喎!>
阿文：<大佬…快D飲杯茶先。>
我：<仲乜咁好口呀! 聽日都無兄弟做架啦。>
阿文：<大佬唔會咁小氣既。係喎…點解唔見阿嫂呀!>
我：< =.=”>
阿威：<死仔呀!你唔記得阿嫂係大佬屋企訓緊教呀?>
我：<=.=”X2>
Fanny：<你無鬼玩啦…不如聽下大佬講下琴日點仲好過啦。>
阿威：<真係醒目既啫。抵我揀你既啫。>
Fanny：<食X燒包啦…講…。>

我就即整晚既事講晒比佢地聽。佢地聽完真係嚇左一跳。Fanny同Maggie聽都有少少眼濕濕。
跟住同我講左D野。令到我更加知道應該點去做。

2011年12月12日星期一

我遇見了她-18

送左Christine返屋企，我就一路慢慢行去搵的士搭。係行依段路，我想起一句說話：往事只能回味。唉～雖然身心都好疲累。但係成個人都總係帶著一份好動力。我忽然間覺得自己好有男人味…因為承諾令到我更成熟。
Christine係我心目中已經唔再係高高在上既女神，而係趺落凡間受苦既天使。而天使已經失左法力，係一個凡人一樣。
依一刻，天使唔小心從天上跌左落地球上既一條村，條村叫公共屋村。相遇一個極度平凡既年青人，年青人見天使無家可歸。
於是就收留依一個天使。如果個故事，比阿威聽到，一定會話鬼我：＜家下Ｄ男人係鍾意魔鬼架。天使~妖~。＞
而阿文一定會話：＜我鍾意Mix。因為我份人比較貪心、同埋咸濕。
行左一陣約五分鐘，收到Christine電話。

我：＜仲乜仲唔訓呀？＞
Christine：＜我訓唔著囉！你行到邊呀！＞
我：＜我岩岩行到去商場對面囉。＞
Christine：＜都係我唔好啦。如果唔去文化中心。你就唔洗無車返屋企啦。＞
我：＜其實唔關你事，就算我唔去文化中心。我平時依個鐘數通常出街食早餐！＞
Christine：＜你陪左我成晚，我想陪返你返屋企。>
我：＜好呀！咁你快D落來啦。我係巴士站等你。＞
Chrisitine：<哦~~ 咁我著埋睡衣落來，你怕唔怕呀？>
我：<Um…唔好啦…一陣我怕好多人去聯合睇眼科!>
Christine：＜依~~咁話人。乜家下我好差咩？>
我：<梗係唔係啦! 講下笑啫^^>
Christine：<Wind呀！我真係好耐無人聽我傾咁耐計啦。＞
我：＜放心！以後都會有個爛GAG王同你傾計架啦，包你唔會屈住屈住^^。＞
Christine：＜Hehe～嗯~咁今晚有冇星星閃落來捉你呀！＞
我：＜今日??Ｄ星星無閃落來捉我喎，只不過…有個喊包捉住左我啫。＞
Christine：＜依～咩野喎。突然諗起Ｄ唔開心既野係咁架拉。自從無左Jenny同阿琼、仲有Wilson佢地之後。好多時喊我都係自己喱埋係間房到喊。＞
我：＜哈～咁我聽日要都買定救生衣。一陣你喊到洪水咁沖走我點算呀！＞
Chrsitine：＜HeHe~唔會架…我都好少喊既。＞
我：＜係唔係依一年先喊得咁勁渣？＞
Christine：＜係呀…終於明白依Ｄ叫報應。＞
我：＜唔係報應…係考驗來架。有時候我都係到諗，日日都要面對好多困難。覺得好幸苦。但係當我只走過，原來我學到好多野。Christine你依家咪學到咩野叫珍貴囉！經驗就係最珍貴!上天考驗你越多，你就得既越多。＞
Christine：＜咁你多唔多考驗呀！＞
我：＜多架…例如～我約Ｄ兄弟出來，成日遲到要佢地等。跟住佢就地就左去。我咪又要追返佢地囉。＞
Christine：＜哈～佢地咁衰呀，唔理你？＞
我：＜咁又唔係，都係我衰先既…^^>
Christine ：<其實我真係好羡慕你有一班咁好既兄弟呀!>
我：<雖然我都覺得好幸運!不過，我相信你既好朋友Jenny、阿琼都會返來你身邊!>
Christine：<我都好想有依一日，不過佢地依一世都唔會原諒我。>
我：<Um……只要有夢想，凡事可成真。>
Christine：<我真係好希望有依一日既來臨。>
我：<依~~有流星喎…>
Christine：<真架~~>
我：<搞掂~~>
Christine：<你仲咩野呀!>
我：<我靜話許左個願囉。>
Christine：<許願？許咩野願呀!>
我：<唔講得架…講左就唔靈架。>
Christine：<唔得呀!你快D講呀!我好想知呀!>
我：<咁好啦…既然你咁有誠意，我就姑且破例講你聽啦。我既願係總有一日，Jenny同阿琼會返來你身邊。>